U rancuri

U rancuri è una poesia del poeta siciliano Ignazio Buttitta, dedicata ai braccianti e ai lavoratori della terra, costantemente vessati e umiliati dai proprietari terrieri e dai loro gabelloti; l’opera è anche una critica alla figura del poeta stesso che per lui dovrebbe essere principalmente voce degli oppressi. 

Buttitta, poeta del popolo che usò la poesia come strumento di difesa della dignità degli umili. 

U RANCURI

Chi mi cuntati?

Io u pueta fazzu!

C’è aria di timpesta

u sacciu,

a viru:

u marusu sata i scogghi,

u celu avvampa!

Chi mi cuntati?

iu a paci amu;

e sta casa facci u mari

cu Palermo nte vrazza,

i muntagni ntesta,

e l’aceddi ca passanu e salutanu.

Vuàtri nte città,

nte palazzi moderni

chi cammareri in divisa;

chi fimmini in vestaglia,

beddi,

e i minni ruri.

Nte palazzi e nte città,

quagghiati du piaciri;

chi cani e chi gatti

ca sàtanu nte ammi,

chi ghiocanu nte divani;

chi mancianu comu vuàtri

e cacanu nte gnuni.

 Io vi cunsidiru,

e forsi

arrivu a scusarivi:

u privilegiu piaci,

l’aviti nto sangu;

e vurissivu ristari a cavaddu

cu elmu e scutu

e li spati puntati;

crociati di l’ingiustizia,

a massacrari i poveri.

Io vi considiru

haiu a facci tosta!

Sunnu i braccianti chi v’odianu,

i disoccupati a turnu;

all’asta nte chiazzi

ad aspittari un patruni

chi pritenni lu baciulimanu.

Sunnu i senzaterra,

i cozzi cotti o suli chi v’odianu,

vonnu i feudi;

u vostru sangu sigillatu nte carti,

un orbu ci leggi!

I feudi,

chi taliati cu cannocchiali

e nàtanu nta l’aria.

Sunnu latri!

Non lu dicu iu

iddi u diciunu:

“Semu latri,

nnu nzignastivu vuàatri”.

Non lu dicu iu

iddi u dicinu:

“I nostri nanni

i nanni ri nostri nanni

i notri patri

si susevanu all’arba;

facevano a strata a pedi,

turnavanu cu scuru,

durmevanu quattr’uri.

Vuàtri aviti a dòrmiri quattr’uri

zappari quattordici uri

disidirari u pani

torciri i cammisi

stricari u mussu nterra

sputari u sangu di primuna,

vuàtri!

Vuàtri aviti a strinciri ossa i fimmina

sunnàri miseria

lamenti

disipirazioni;

darivi pugna ntesta,

vuàtri!”

Non lu dicu iu

iddi u dicinu:

“Si niscissiru di fossi

i nostri morti

vi nfurcassiru;

v’abbruciassiru vivi!

Vi mittissiru u capizzuni

u sidduni

u suttapanza

i spiruna a valanza

i muschi cavaddini;

e lignati nte rini, 

nte rini!”

Non lo dicu iu

iddi u dicinu:

“Facevanu i guerri,

(i faciti ancora

e poveri di dintra

ed e populi di fora)

u re mannava a cartulina,

urdinava a mobilitazioni;

i matri accumpagnavanu

i figghi a staziuni,

i muggheri u maritu;

i picciriddi chiancevanu,

e vuàtri battevavu i manu.

Arrivavanu o campu,

u ginirali faceva a parrata;

u parrinu diceva a missa,

dava i santuzzi,

l’infirvurava:

‘cu mori cca,

acchiana ncelu’,

e ghisava u iritu.

U diceva apposta;

i morti ristavanu suttaterra,

scattavano;

i fimmini si vistevanu a luttu.

si scurciavanu l’ossa;

mmaledicevanu u nfernu,

u paradisu;

i figghi

taliavanu u ritrattu o muru,

u ritrattu du guardianu da ca,

mortu”.

Non lu dicu iu

iddi u dicinu:

“Ci facevavu u monumentu,

ci scrivevavu l’epigrafi;

nomi

cugnomi

gradu:

Morti per la patria!”.

Sgràccanu na bistemia:

“Morti pi patruna!

Pi porci grassi!

Pi lupi!”

Non lo dicu iu,

iddi u dicinu:

“Fineva a guerra,

i vivi turnavanu;

l’orbi

i surdi

i muti,

i pazzi turnavanu;

turnavanu chiddi chi ammi tagghiati,

i sfriggiati,

i senzavrazza;

ci appizzavanu i midagghi,

-i frattagghi o pettu-

e i facevanu sfilari;

a banna sunava:

viva u re!

viva u re!

e vuàtri battevavu i manu”.

Non lu dicu iu

iddi u dicinu:

certi voti chiancinu

si muzzicanu i manu;

io mi cummovu.

“Turnavanu nte tani” dicinu,

“Turnavanu a manciari erba, 

a scaricari varrìla di suduri,

a marinari cunigghi magri;

i cunigghi figghiavanu cunigghi,

l’erba non bastava.

Si niscevanu di tani

cu l’ugna i fora,

cu ritrattu du re,

chi banneri tricculura;

chi picciriddi nte crapicchi

c’addattavanu sucu d’erba amara,

si scatinava a carnificina;

ci mannavanu i carrubinieri,

i surdati italiani

a sparari supra i scheletri:

addumavanu cu un cirinu,

finevanu nte chiazzi!

Vineva u carruzzuni,

arrichiggheva a munnizza,

u parrinu a binidiceva:

requièscat in pace,

e a munnizza acchianava ncelu.

Ncelu si riuniva a ‘Corti’:

giurati

magistrati

presidenti,

e facevanu u prucessu:

ascuravanu a parti lesa,

i testimoni,

a difisa;

nisceva a sintenza,

assolti!

Cumparevanu l’ancili;

l’ancili ci mpristavanu l’ali,

San Petru grapeva i porti,

e a munnizzi traseva mparadisu”.

Non lu dicu iu

iddi u dicinu.

Io u pueta fazzu;

caminu supra i negghi,

leggiu nto celu,

cuntu i stiddi,

parru ca luna:

acchianu

e scinnu!

U pueta fazzu:

tessu,

raccamu,

cusu,

scusu;

arripezzu cu fili d’oru!

Adornu,

allisciu,

allustru;

decoru senza culuri!

Ntrizzu ciuri,

appàru artari,

chiantu banneri;

abbilisciu u munnu,

carmu u mari ca vuci!

Sugni un ghiardinu di ciuri

e mi spartu a tutti;

una cassa armonica

e sonu pi tutti;

un agneddu smammatu

e chianciu pi tutt agneddi smammati.

Chi mi cuntati?

iu u pueta fazzu;

amu i tavuli cunzati,

i fimmini,

i piacìri,

u lussu.

Amu u dinari

(a bumma atomica nte manu di l’omu,

nto cori di l’omu

e nun scatta!)

U pueta fazzu,

e vogghiu a paci nta me casa

pi scurdari a guerra

nte casi di l’àutri:

sugnu un cani da vostra razza!

Non mi manca nenti,

non disidiru nenti;

sulu na curuna

pi recitari u rusariu a sira,

e nun c’è nuddu

chi me la porta di ferru filatu

pi nchiacchiarimi a un palu!

Figli di Sicilia